Thaenaaram | Tamil Obituary Notices | Remembrance Notices | Tamil Death Notices

ஹெரோயினுக்காக வீடுடைக்கும் திருட்டுக் கும்பல் கைது

வீடு உடைத்து நகைகளைத் திருடி ஹெரோயின் போதைப் பொருளை வாங்கிய பிரதான சூத்திரதாரி உட்பட மூவரைத் தாம் கைது செய்துள்ளனர் என்று யாழ். மாவட்ட குற்றத்தடுப்பு பொலிஸார் தெரிவித்தனர்.

கடந்த ஜனவரி 28ஆம் திகதி யாழ்ப்பாணம் - கலட்டி - பிறவுண் வீதியிலுள்ள பூசகர் ஒருவரின் வீட்டில் எவருமில்லாத சந்தர்ப்பத்தை பார்த்து, வீட்டின் கதவை உடைத்துத் திறந்து உள்ளே சென்றவர்கள் 24 பவுண் நகைகளை களவாடி சென்றனர்.

இந்தச் சம்பவம் தொடர்பில் யாழ்ப்பாணம் பொலிஸ் நிலையத்தில் பூசகர் முறைப்பாடு செய்திருந்தார். இந்தச் சம்பவம் தொடர்பில் விசாரணை நடத்திய யாழ். மாவட்ட குற்றத் தடுப்புப் பிரிவின் பொறுப்பதிகாரி நிகால் பிரான்சிஸ் தலைமையிலான குழுவினர் தமது விசாரணைகளை மேற்கொண்டனர்.

இதனடிப்படையில் பெறப்பட்ட தகவல்கள் மற்றும் விசாரணைகள் அடிப்படையில் பிரதான சந்தேகநபர் யாழ். கஸ்தூரியார் வீதியில் வைத்து அதிரடியாக கைது செய்யப்பட்டார்.

கைது செய்யப்பட்ட நபரிடம் நடத்தப்பட்ட விசாரணையில் திருடப்பட்ட நகைகளை திருட்டுக்கு உடந்தையாக இருந்த நபர் ஒருவர் மூலம் வங்கியில் பணிபுரியும் ஒருவரின் உதவியுடன் வேலணையில் உள்ள வங்கி ஒன்றில் அடகு வைத்தனர் என்றும், இதன் மூலம் கிடைத்த பணத்தைக் கொண்டு ஹெரோயின் போதைப் பொருளை கொள்வனவு செய்தனர் எனவும் வாக்குமூலம் அளித்துள்ளார்.

மேலும், ஒரு நெக்லஸ் மற்றும் காப்பு ஒன்றும் தனியார் அடகு நிறுவனம் ஒன்றில் வைக்கப்பட்டுள்ளதால் அதனை மீட்கும் முயற்சியை பொலிஸார் மேற்கொண்டுள்ளனர். திருடப்பட்ட மிகுதி நகைகள் பொலிஸாரால் மீட்கப்பட்டன.

அத்துடன், பிரதான சூத்திரதாரிக்கு உடந்தையாக செயல்பட்டனர் என்ற குற்றச்சாட்டில் சுன்னாகத்தைச் சேர்ந்த 28 வயது நபரும், நகைகளை அடகு வைக்க உதவிய வேலணையை சேர்ந்த 30 வயது நபரும் கைது செய்யப்பட்டனர்.

ஹெரோயின் பாவனையால் யாழ்ப்பாணத்தில் இவ்வாறான திருட்டு சம்பவங்கள் அதிகரித்துள்ளன. போதைப் பொருள் பாவனையில் சிக்கியுள்ள இளைஞர்கள் தொடர்பில் பெற்றோர் கூடுதல் கவனம் செலுத்தும்படியும் பொலிஸார் அறிவுறுத்தியுள்ளனர்.